വാത്സല്യം - ഒരാസ്വാദനശ്രമം

ഇതൊരു ശ്രമം മാത്രമാണ്. ഇന്നത്തെക്കാലത്ത് ഈ ചിത്രത്തിനു ചിലപ്പോള്‍ നമ്മുടെ ആസ്വാദനതലത്തില്‍ യാതൊരു സ്ഥാനവുമുണ്ടായിരിക്കില്ല. എന്നിരുന്നാലും മനസ്സിനെ സ്പര്‍ശിച്ച ഒരു സിനിമയെന്ന അല്ല ജീവിതമെന്ന്‍ തോന്നിയതുകൊണ്ട് ഈ സാഹസത്തിനു മുതിരുന്നു...

മലയാള സിനിമയിലെ എക്കാലത്തേയും മികച്ച വിജയചിത്രങ്ങളുടെ കുത്തൊഴുക്കായിരുന്നു 1993 കാലഘട്ടം..ആകാശദൂത്, ദേവാസുരം, ഏകലവ്യന്‍, വാത്സല്യം,കാബൂളിവാല, മണിചിത്രത്താഴ്, മേലേപ്പറമ്പില്‍ ആണ്‍ വീട്..അങ്ങിനെയങ്ങിനെ നിരവധി എണ്ണം. പല ചിത്രങ്ങളും തിയേറ്ററുകള്‍ നിറഞ്ഞോടി.കലാപരമായും വാണിജ്യപരമായും മികച്ച വിജയങ്ങളായിരുന്നു മിക്ക സിനിമയും..ഇക്കൂട്ടത്തില്‍ എടുത്ത് പറയേണ്ടുന്ന ഒന്നാണ് മലയാളത്തിന്റെ മഹാനടന്‍ മമ്മൂട്ടി തകര്‍ത്തഭിനയിച്ച വാത്സല്യമെന്ന ചിത്രം. ആദ്യകാലങ്ങളില്‍ കൊടും വില്ലനായും പിന്നീട് പക്കാ കൊമേഡിയനായും ഇപ്പോള്‍ നിത്യതയിലാണ്ട് വിശ്രമിക്കുകയും ചെയ്യുന്ന ശ്രീ കൊച്ചിന്‍ ഹനീഫയായിരുന്നു ഈ ചലച്ചിത്രവിസ്മയത്തിന്റെ സംവിധാന ചുക്കാന്‍ പിടിച്ചത്. ലോഹിതദാസ് എന്ന അനുഗ്രഹീത കഥാകാരന്റെ തൂലികയില്‍ നിന്നും ഉതിര്‍ന്നുവീണ ഈ ചിത്രം മലയാളികള്‍ നെഞ്ചോടടക്കിപ്പിടിച്ചു എന്നുള്ളതാണ് വാസ്തവം.അക്കൊല്ലത്തെ മികച്ച നടനുള്ള സംസ്ഥാനസര്‍ക്കാറിന്റെ പുരസ്ക്കാരം മമ്മൂട്ടിയ്ക്ക് ഈ ചിത്രത്തിലെ അഭിനയത്തിനു ലഭിക്കുകയുണ്ടാ​യി.

കഥാസാരം

മേലേടത്ത് തറവാട്ടിലെ കാരണവരാണ് രാഘവന്‍ നായര്‍.ഭാര്യ മാലതിയും രണ്ട് കുട്ടികളും അനുജന്‍ വിജയകുമാരന്‍ നായരും പിന്നെയൊരനുജത്തി സുധയും അമ്മ ജാനകിയമ്മയും അടങ്ങുന്ന പേരുകേട്ട വലിയൊരു തറവാട്. എപ്പോഴും ബീഡിവലിച്ച് ചുമച്ച് ചുമച്ചിരിക്കുന്ന വല്യമ്മാവന്‍ കുഞ്ഞന്‍ നായരും അയാളുടെ മകള്‍ നളിനിയും ആ വീട്ടില്‍ തന്നെ താമസം. രാഘവന്‍ നായരുടെ അനുജന്‍ വക്കീലിനു പഠിക്കുവാണ്. നളിനിയെ വിജയനെക്കൊണ്ട് കല്യാണം കഴിപ്പിക്കണമെന്നത് രാഘവന്‍ നായര്‍ക്കൊപ്പം ആ വീട്ടിലെ മറ്റെല്ലാവര്‍ക്കും ഗൂഡമായൊരാഗ്രഹമുണ്ട്.രാഘവന്‍ നായരുടെ പ്രധാനജോലി കൃഷി തന്നെ. പാടത്തുനിന്നും വൈകിട്ട് വന്ന്‍ കുളിയൊക്കെക്കഴിഞ്ഞ് അല്‍പ്പം രാമായണമൊക്കെ വായിച്ച് മക്കളോട് വര്‍ത്തമാനമൊക്കെപ്പറഞ്ഞ് അവിരാമമൊഴുകുന്ന പുഴപോലൊരു ജീവിതം.രാഘവന്‍ നായര്‍ക്ക് ചേര്‍ന്ന ഭാര്യതന്നെയായിരുന്നു മാലതിയും.ഭര്‍ത്താവിന്റെ ഇഷ്ടാനിഷ്ടങ്ങള്‍ കണ്ടറിഞ്ഞ് പെരുമാറുന്ന സ്നേഹത്തിന്റെ നിറകുടമായ നാട്ടുമ്പുറത്തുകാരി.

അനുജന്‍ വക്കീല്‍ പരീക്ഷ പാസ്സായ ദിനം രാഘവന്‍ നായരുടെ സന്തോഷം സീമാതീതമായിരുന്നു.നഗരത്തിലെ പ്രശസ്തനായ വക്കീലിന്റെ ജൂനിയറായി അവനെ ചേര്‍ക്കുമ്പോള്‍ രാഘവന്‍ നായര്‍ ശരിക്കും സന്തോഷിച്ചു.വരാനുള്ളസന്താപങ്ങളൊന്നുമോര്‍ക്കാതെയുള്ള നിറഞ്ഞ സന്തോഷം.

പട്ടണത്തില്‍ താമസിച്ച് വക്കീല്‍ ജോലികളുമായി നീങ്ങവേ വിജയന്‍ സീനിയര്‍ വക്കീലിന്റെ മകളുമായി അടുക്കുകയും ആ വിവാഹക്കാര്യം രാഘവന്‍ നായരുടെ മുന്നിലെത്തുകയും ചെയ്യുന്നു. രാഘവന്‍ നായര്‍ എന്ന മനുഷ്യനാദ്യമായി തകര്‍ന്നുതുടങ്ങുന്ന നിമിഷം.മനസ്സിന്റെ കോണിലുണ്ടായിരുന്ന വിജയനും നളിനിയുമായുള്ള കല്യാണം രാഘവന്‍ നായര്‍ കുഴിച്ചുമൂടി.അല്ലെങ്കിലും സഹോദരങ്ങള്‍ക്ക് ഇഷ്ടകരമല്ലാത്ത ഒന്നും ചെയ്യുവാന്‍ തക്ക മനസ്സുള്ള ആളായിരുന്നില്ല നായര്‍.

പട്ടണവാസിയായ പരിഷ്ക്കാരിഭാര്യയ്ക്ക് മേലേടത്തു വീട്ടിലെ രീതികളോടൊക്കെ തികഞ്ഞ പുശ്ഛമായിരുന്നു. പാടത്ത് പണികഴിഞ്ഞ് വിയര്‍പ്പും ചളിയുമായി ആഹാരം കഴിക്കാന്‍ വന്നിരിക്കുന്ന രാഘവന്‍ നായരെക്കണ്ട ദേക്ഷ്യത്തില്‍ അവര്‍ അറപ്പോടെ എഴുന്നേറ്റുപോകുന്നുണ്ട്. പതിയെപ്പതിയെ ആ കുടുംബത്തില്‍ തനിക്കുള്ള കാരണവര്‍ സ്ഥാനം നഷ്ടമാകുന്നത് രാഘവന്‍ നായര്‍ക്ക് മനസ്സിലാകുന്നുണ്ടായിരുന്നു. സ്വന്തം വീടില്‍ താന്‍ അന്യനായിക്കൊണ്ടിരിക്കുന്നതറിഞ്ഞ ആ ശുദ്ധഹൃദയനൊപ്പം മേലേടത്ത് തറവാട്ടിലെ മറ്റുപലരും തേങ്ങി. ഒടുവില്‍ തറവാട് ഭാഗം വയ്ക്കുക എന്ന കര്‍മ്മവുമെത്തി.

വീടുവിട്ട് മക്കളും ഭാര്യയുമായി രാഘവന്‍ നായര്‍ ദൂരെയൊരു സ്ഥലത്തേയ്ക്ക് പോകുന്നു. ആളൊഴിഞ്ഞ തറവാട്ടിലെ ശൂന്യതയില്‍ വിജയന്‍ തിരിച്ചറിയുകയായിരുന്നു തന്റെ വല്യേട്ടന്റെ വിലയെന്തായിരുന്നുവെന്ന്‍. ഏട്ടനെ തിരക്കിയിറങ്ങുന്ന അവന്‍ കാണുന്നത് രാഘവന്‍ നായര്‍ പുതിയ സ്ഥലത്ത് മണ്ണിനോട് പടവെട്ടിത്തുടങ്ങുന്നതാണ്..

ഹൃദയെത്തെ തൊടുന്ന മൂന്നു ഗാനങ്ങളായിരുന്നു ചിത്രത്തിലുണ്ടായിരുന്നത്. താമരക്കണ്ണനുറങ്ങേണം എന്ന ഗാനം മൂളാത്തവര്‍ ആരും തന്നെയില്ലായിരുന്നുവെന്ന്‍ നിസ്സംശയം പറയാം. ഇന്നും കുട്ടികളെയുറക്കുവാന്‍ പറ്റിയ ഒന്നാന്തരം താരാട്ടുപാട്ടുതന്നെയാണത്...



അതുപോലെ അലയും കാറ്റിന്‍ ഹൃദയം എന്ന ഗാനം..ആ പാട്ടുസീന്‍ ഹൃദയവേദനയോടുകൂടി മാത്രമേ കണ്ടു തീര്‍ക്കാനാവൂ..



ഈ ചിത്രത്തിലെ ഏറ്റവും മനോഹരമായ രംഗം രാഘവന്‍ നായരും കുടുംബവും വീടുവിട്ടിറങ്ങുന്ന സീനാണു.കരഞ്ഞുകൊണ്ട് പുറകിലേയ്ക്ക് നോക്കി നടക്കുമ്പോള്‍ കല്ലുതട്ടി ഒന്നായുന്ന മാലതി രാഘവന്‍ നായരുടെ തോളില്‍ അമര്‍ത്തിപ്പിടിക്കുന്ന സീന്‍ യഥാര്‍ത്ഥ ജീവിതത്തില്‍ നടക്കുന്നതുപോലെ അനുഭവവേദ്യമായിരുന്നു.ഒരു രാഘവന്‍ നായര്‍ യഥാര്‍ത്ഥത്തില്‍ ജീവിച്ചിരുന്നുവെങ്കില്‍ അയാള്‍ക്ക് മാലതിയെന്ന ഭാര്യയുണ്ടായിരുന്നുവെങ്കില്‍ അവര്‍ക്കൊരിക്കലും വാത്സല്യത്തിലെ രാഘവന്‍ നായരും മാലതിയുമായി ജീവിക്കുവാനാകുമായിരുന്നില്ല. അതെ പകര്‍ത്താനാവാത്തത്ര അസുലഭദൃഡമായ ജീവിതം..അതായിരുന്നു രാഘവന്‍ നായരുടേത്..

ശ്രീക്കുട്ടന്‍